Óundirbúnir fréttamenn.

Dæmalaus frétt var á stöð 2 í gærkvöldi.  Í tilefni þess að skólarnir eru að byrja fór fréttamaður inn í eina af stóru bókabúðum landsins og spurði um verð á ákveðinni tegund skólatösku.  Svarið var að skólataskan kostaði 10.900.- kr .  Þar sem fréttamaðurinn vissi að nákvæmlega sama taskan kostar 7200.- kr. út úr búð í Danmörku spurði  hann talsmann verslunarinnar hvernig stæði á þessum mismun sem er í kringum 50%.  Talsmaður verslunarinnar setti sig í spekingslegar stellingar og sagði ástæðurnar vera tollar og virðisaukaskattur.  Jahá þarna var svarið komið.  Fréttamaðurinn þakkaði skýr svör og yfirgaf svæðið. 

Hvers konar fréttamennska er þetta eiginlega.  Hvað er hið rétta í málinu?  Auðvitað er virðisaukaskattur líka í Danmörku.  Er kannski ekki virðisaukaskattur á skólatöskum í Danmörku eins og hér?  Það var ekki upplýst í fréttinni.  Það hefði fréttamaðurinn auðvitað átt að vera búinn að kynna sér.  Í öðru lagi spurði hann ekki augljósustu spurningarinnar  þ.e. hver álagningin væri á skólatöskum í versluninni  en ekki er ólíklegt að þar væri að finna stóran hluta skýringarinnar.  Sjónvarpsáhorfendur eiga a.m.k. að fá upplýsingar um svo mikilvægt atriði.  Nei fréttamanninnum fannst ekki ástæða til að spyrja um slíka smámuni.

Miklu betra er að fréttamenn sitji heima heldur en að fara óundirbúnir í spurningaleiki sem gefa kolranga niðurstöðu eins og þetta litla dæmi sýnir glöggt. Sjónvarpsáhorfendur eru skildir eftir með þá ,,vitneskju" að 50% munur á verði á skólatöskum hér og í Danmörku sé vegna þess að á Íslandi er virðisaukaskattur!

Athugasemdir

[Valgerður Halldórsdóttir, 16.8.2007 kl. 14:43]

Já sammála þér- það mætti í þessu máli sem og fleirum fara betur ofan í saumana á málum.

[Halla Rut , 25.8.2007 kl. 16:29]

Ég bara skil ekki þetta mál allt saman. Ef taskan er of dýr þá ekki kaupa hana. Álagning er frjáls hér og mega þeir bjóða þessar töskur til sölu á 100.000kr ef þeir vilja. Einu sinni var það svo á Íslandi að sala á flestum hlutum var á mjög fárra höndum en þannig er það ekki í dag. Samkeppni er gífurleg og það er okkur neytendanna að halda álagningu og verði inni. Ef þeir geta selt töskuna dyra og grætt þannig mikið á því þá gera þeir það. Þetta er "buisness" ekki ríkisstofnun.

[Þórdís Bára Hannesdóttir, 25.8.2007 kl. 16:52]

Hvað er erfitt að skilja? Takmark fréttamanna hlýtur að vera það að fá svör ekki hálfsvör þá er betra að sitja heima. Fréttamenn verða að undirbúa sig,vita hvers þeir eiga að spyrja.  Afhverju spurði fréttamaðurinn ekki hver álagningin væri? hann var að leita skýringa á verðmismuninum. Það vita allir að verðlagning er frjáls.  Er mikil samkeppni hér á landi? 

[Lárus Gabríel Guðmundsson, 27.8.2007 kl. 01:13]

Það er þykkt klínt á hérna heima. Það vita allir. Ég er sammála Höllu Rut um það að við neytendur stjórnum því hvort vara sé "of" dýr eða ekki. Margur hefur gert sig að fífli við innkaup á einhverjum tískuvarningi bara fyrir sakir merkis. Búðareigendurnir standa eflaust oft skellihlæjandi og hrista hausinn yfir því hvernig hægt sé á köflum að fífla Jón og Jónu út í bæ.

Fréttamaðurinn....tjjjaaaaa......er ekki augljóst að hann afklæddi búðareigandann á staðnum og þurfti því ekki frekari svör ???