Davíð reiður og sár.

Átakanlegt var að hlusta á viðtalið við Davíð í kvöld þar sem hans innri maður kom vel fram og þá sérstaklega hve óhemju viðkvæmur hann er.

Sigmar mátti varla segja heila setningu án þess að hann tæki það sem persónulega móðgun og árás á sig.

Ljóst er að Davíð verður að hætta strax allra hluta vegna.  Honum líður greinilega illa og engin ástæða er til að framlengja þetta kvalræði. 

Davíð virðist misskilja gjörsamlega þá gagnrýni sem hann hefur fengið á sig.  Það dettur engum í hug að hann sé óheiðarlegur eða að hann reyni ekki að sinna sínu starfi vel.  Kjarninn er einfaldlega sá að Seðlabankinn undir hans stjórn nýtur einskis trausts í fjármálaheiminum hvort sem mönnum líkar það betur eða ver.

Davíð eyddi löngu máli í að segja frá því hversu mikið hann hefði varað íslensk stjórnvöld við vandanum sem við blasti. Svo þegar aumingja Sigmar spurði í framhaldi af því þeirrar sjálfsögðu spurningar hvort stjórnvöld hefðu þá ekkert hlustað á hann eða brugðist neitt við, þá var það ekki heldur nógu góð spurning því þá var Sigmar að ráðast á Sjálfstæðisflokkinn. Þannig flosnaði viðtalið upp þar sem engin spurning var nógu góð og viðtalið endaði síðan í einræðu Davíðs þar sem hann í mikilli geðshræringu lýsti því yfir hvað hann væri traustur og góður og engin væri að gera neitt af viti í landsstjórninni.  Er ekki komið meira en nóg af allri þessari vitleysu?

Athugasemdir

[Jakob Þór Haraldsson, 24.2.2009 kl. 23:36]

BLÁSKJÁR er maður með húmor og gullfiskaminni sýnist mér svona í fljótu bragði.... Ég hélt að það hefði nefnilega verið Davíð sem ÁKVAÐ að Björgólfur eldri fengi gefins Landsbankann því það hefði verið farið svo illa með hann í tengslum við Hafskip. Ég hélt reyndar að Björgólfur hefði farið illa með Hafskip, og nú nokkrum árum síðar er Björgólfur einnig búinn að “sökva” Eimskip, Morgunblaðinu, Landsbankanum og Bláa höndin náði að gera Seðlabankann “tæknilega gjaldþrota” á sinni vakt - en samt varaði hann alltaf við þessum “óreiðumönnum”...   Við skulum leyfa Davíðs stjörnunni að skýna skært, hún lýsir veginn fyrir RÁNFUGLINN..:)....

[Sigurður Ásbjörnsson, 24.2.2009 kl. 23:47]

Mér er nú ekkert illa við Norðmenn, en má ekki bjóða þeim Davíð með hinum gaurnum.

[Valsól (IP-tala skráð) 24.2.2009 kl. 23:54]

Þetta er besta fréttaskýring á þessum Kastljósþætti sem ég hef lesið í kvöld. Takk fyrir það.

[Gævar (IP-tala skráð) 25.2.2009 kl. 00:30]

Það vantar Seðlabankastjóra til Norður Kóreu. Kim ill yrði hrifinn að svona perfegt gæja.

[Kristinn (IP-tala skráð) 25.2.2009 kl. 01:03]

Ertu til í að rökstyðja þessa setningu aðeins betur

"Kjarninn er einfaldlega sá að Seðlabankinn undir hans stjórn nýtur einskis trausts í fjármálaheiminum hvort sem mönnum líkar það betur eða ver."

 Mikið hefur verið talað um þetta en hvergi hefur þetta komð fram svart á hvítu nema frá vissumþettaallteftiráhagfræðingum og stjórnmálamönnum hér heima sem kannski eru ekki alveg á hlutlausu línunni

 Nóg virðist traustið vera til að seðlabankastjóri fyrrverandi er ráðin í vinnu af erlendum seðlabanka.   Nóg virðist traustið vera frá AGS til að lýsa því yfir að nú sé hægt að byrja að lækka vexti og afnema gjaldeyrishöftin.

[Anna Benkovic Mikaelsdóttir, 25.2.2009 kl. 01:34]

Takk Þórdís...hlustaði nefnilega fyrst og sá ekki hversu tekinn maðurinn er og var svo að horfa núna og sé að hann verður að taka sér frí...ásamt konu sinni og slappa af!  Honum líður ekki vel, nú er nóg komið!

[Stefán Már (IP-tala skráð) 25.2.2009 kl. 02:04]

Tek undir með Valsól, eins og talað úr mínum munni.

[Gunnar Th. Gunnarsson, 25.2.2009 kl. 02:20]

Tek undir orð Kristinns (óskráður) . Hverjir eru það nákvæmlega sem bera ekki traust til Seðlabankans?

[Jón Gunnar Benjamínsson (IP-tala skráð) 25.2.2009 kl. 02:58]

Búhúúú....aumingja Simmi segir þú Þórdís trekk í trekk. Aumingja þáttarstjórnandinn sem fékk það sem allir aðrir fjölmiðlamenn á Íslandi hafa óskað sér síðustu vikur, að fá að taka viðtal við Davíð sem var eins og sást augljóslega alltaf skrefinu á undan Simma, alveg frá byrjun. Simmi var eins og flóðhestur á eiturlyfjum í þoku, óð slagandi út um allt og steig þungt til jarðar með spurningum sínum (að hann taldi) en vissi ekkert hvert hann var að fara.

Aðeins varðandi vanlíðan Davíðs sem þú sást svo augljóslega á honum; hefurðu hugsað um það eitt augnablik hvernig að er að upplifa sprengingar fyrir utan heimili sitt um miðjar nætur og vera rændur nætursvefni, vera hundeltur af blaðamönnum DV (Orkum Baugsveldisins) út um allar trissur og þrífa viðbjóð af heimili sínu alla daga? Hefur þú upplifað þetta? Getur þú sest í dómarasæti og dæmt um líðan manns sem þú þekkir ábyggilega ekki gramm persónulega?

Tek einnig undir með Kristni hér að ofan.

Og Jakob varðandi einkavæðinguna sem Davíð gaf leyfi fyrir...

Ert þú s.s. að segja að sá sem fann upp bílinn beri í dag ábyrgð á öllum glæpa og háskaakstri í dag bara af því hann hannaði farartækið?

Píp og marklaust mal.

[orn (IP-tala skráð) 25.2.2009 kl. 06:54]

að mínu mati var Davíð málefnalegur og rökfastur.  Hann einmitt svaraði skýrt og vel. Hvet fólk til að setjast niður, ýta fordómum sínum gagnvart manninum til hliðar og hlusta........

Varðandi Ingimund þá segir það sína sögu að Noregur......fyrirheitna landið hans Steingríms J...beið ekki boðanna til að fá hann í sínar raðir inn norska seðlabankans....það einmitt sýnir að traustið er til staðar og þá gildir það hið sama um Davíð og Eirík.....eða haldið þið að sá norski hafi tekið Ingimund út sérstaklega..treyst honum en ekki öðrum....að sálfsögðu ekki

[Kristján Elís (IP-tala skráð) 25.2.2009 kl. 09:13]

Það er sérkennileg samlíking hér á ferðinni með  bílinn.   Það vill svo til að Davíð er einn af aðalhönnuðum "bílsins"  og hann stýrði líka  löggjöfinni um umferðina  og ekki nóg með það,  hann ákvað svo prívat og persónulega  að taka að sér eitt aðalhlutverkið í að stórna umferðinni.   Allt hefur þetta brugðist

[Guðmundur (IP-tala skráð) 25.2.2009 kl. 09:37]

"Politicians should not become central bank governors. Mr Oddsson is part of the problem, not of any solution, and should resign immediately." (Richard Portes, The Shocking Errors Behind Iceland's Meltdown)

"Seðlabankastjóri hefur greinilega lítinn skilning á alþjóðlegum fjármálum. Ef hann hefði það, hefði hann ekki reynt að festa krónuna við evru í október 2008 þegar Ísland átti vart nokkurn gjaldeyrisforða eftir, ákvörðun sem seðlabankastjóri tók án þess að ráðfæra sig við yfirhagfræðing Seðlabankans. Það var skammlífasta festing eins gjaldmiðils við annan sem vitað er um. Allir erlendir álitsgjafar sem fjallað hafa um íslenska vandann - þeirra á meðal Willem Buiter og Richard Portes - hafa kallað eftir brottvikningu seðlabankastjóra. Brottvikning myndi senda fjármálamörkuðum heimsins merki um að Íslandi væri alvara með að koma sér aftur á beinu brautina." (Robert Wade á borgarafundi)

"Oddsson made his tiny country an experiment in free-market economics ... Iceland's economy is now a textbook case of macroeconomic meltdown. The three banks, which were massively leveraged, are in receivership, GDP could drop 10% this year, and the IMF has stepped in after the currency lost more than half its value. Nice experiment." (Time Magazine, 25 People to Blame for the Financial Crisis.)

"During the final death throes of Iceland as an international banking nation, a number of policy mistakes were made by the Icelandic authorities, especially by the governor of the Central Bank of Iceland, David Oddsson." (Willem Buiter og Anne Sibert, The Inevitability of Iceland's Banking Collapse)

Nægir þetta, Kristinn og Gunnar?

[Gunnar Th. Gunnarsson, 25.2.2009 kl. 10:09]

• Er "Time Magazine" eða aðrir fjölmiðlar sem selja fyrirsagnir, mælikvarði á trúverðugleika Seðlabankans?
• Eru sérvaldir álitsgjafar Baugsveldisins, VG og Samfylkingarinnar trúverðug vitni um trúverðugleika Seðlabankans?
• Eru "eftiráspekingar" trúverðugir?

Skýrsla rannsóknarnefndarinnar mun birtast í nóvember. Ég er ekki hissa á að pólitískir andstæðingar Davíð vilji ganga endanlega frá honum áður en hún kemur fram. Þeir óttast skýrsluna.

[ASE (IP-tala skráð) 25.2.2009 kl. 10:36]

Af hverju grunaði manni að dæmin sem Guðmundur tiltók yrði svarað með því að náttúrulega ekkert að marka viðkomandi aðila!

Þessi (trúarbragða-) umræða með og á móti Davíð er til skammar fyrir íslensku þjóðina.  Stjórnmálaumræðan öll er til skammar fyrir íslensku þjóðina, þessar umræður eru á svo lágu plani.  Hvað varð um að skiptast á SKOÐUNUM á MÁLEFNUM á upplýstan hátt eins og vitiborið fullorðið fólk?  Ekki eins og krakkar með "pabbi minn er betri en pabbi þinn sem er fífl með hor". 

Sama hvað fólki finnst um Davíð þá er hann bara EKKI málið, ótrúlegt en satt!  Íslenskt þjóðfélag riðar á barmi gjaldþrots.  Það eru margar ástæður fyrir því og í stuttu máli má sennilega segja að allt og allir hafi brugðist skyldu sinni.  Það hlýtur að segja sig sjálft að þegar svona efnahagshamfarir gerast þá þarf að skipta um fólk í brúnni, því þeir sem voru við stjórnvölinn bara geta ekki talist líklegir/æskilegir/trúverðugir (pick a word, sama hvað velur gengur ekki) til að leiða þjóðina út úr þeirri sorgarstöðu sem hún er komin í.  Þetta er ekkert PERSÓNULEGT, bara heilbrigð skynsemi.  Það þarf að endurbyggja traust í samfélaginu og til þess þarf að breyta um áherslur og til þess þarf nýtt fólk að koma að málunum á ÖLLUM sviðum, þ.e. í stjórnmálum, FME, Seðlabankanum, bönkunum og viðskiptalífinu. 

Hættum að karpa um keisarans skegg, förum að ræða það sem skiptir máli.  Við þurfum ekki að vera sammála um alla hluti en í guðana bænum berum virðingu fyrir skoðunum annarra, tölum en hlustum líka.  Það hefur enginn bara rétt fyrir sér eða bara rangt fyrir sér, þannig virkar lífið bara ekki!  Reynum að finna bestu lausn að hverju máli, það skiptir nákvæmlega engu máli hver á bestu lausnina í hverju tilviki, hins vegar skiptir það öllu fyrir okkur að velju bestu lausnina í hverju tilviki því meira að segja bestu lausnirnar eru ekkert sérstaklega spennandi eins og fyrir okkur er komið í dag.  Hvað þá þær næstbestu nú eða verstu! 

Ég er ekki sérstaklega trúuð EN bara verð því finnst svo sannarlega ekki veita af núna: Guð blessi íslensku þjóðina