Áróður og staðreyndir um Icesave málið.

Undirrituð verður sífellt meira undrandi á furðulegum umræðum sem eru hér á netinu um Icesave málið. Gott dæmi um það er að 15. júlí s.l. gaf Seðlabanki Íslands út það sérfræðiálit að við Íslendingar gætum auðveldlega staðið við Icesave samkomulagið.Í þessu sambandi má nefna að í Seðlabankanum vinna fleiri tugir sérfræðinga sem hafa þann aðalstarfa að fjalla um peningamál og gera áætlanir um þróun efnahagsmála. Þetta passar náttúrulega ekki inn í áróðurinn og því sagt vera eintóm vitleysa.

Nú kemur fram á sjónarsviðið Eva Joly hinn ágæti norsk-franski rannsakandi og segir að skuldirnar séu allt of háar. Þetta passar vel í áróðurinn og nær allir bloggarar sammála um að þetta sé alveg hárrétt. 

Einnig má í þessu sambandi  nefna inDefence hópinn sem er á móti Icesave samningnum af því að það eigi að fara hina svokölluðu dómstólaleið.  Bíðum aðeins við, hvað eiga menn við með þessu?  Það var ákveðið í október s.l. milli þjóðanna þriggja að fara ekki dómstólaleiðina heldur skyldi fara samningaleiðina.  Hvað þýðingu hefur það þá nú að koma fram og segja við erum algjörlega á móti Icesave samningnum vegna þess að það átti að fara dómstólaleiðina.  Bull bull bull.

Þá var því haldið mjög stíft fram að lánakjörin væru slæm.  Svo kemur í ljós við nánari athugun að lánakjörin eru með þeim bestu sem þekkjast.

Alvarlegast af öllu er þó sá áróður að það sé hægt að fá betri samning með því að fella Icesave samninginn núna.  Auðvitað er alls engin rök fyrir þessari skoðun.  Þvert á móti eru miklar líkur til þess að höfnun á samningnum myndi stórskaða okkur sem þjóð sem gæti þýtt enn meira atvinnuleysi, fólksflótta og lífskjaraskerðingu.  

Kominn er tími til að menn átti sig á því að þetta er ekki lengur neinn blogg leikur heldur eru menn með þessum heimskulega áróðri hugsanlega að stórskaða möguleika Íslands í framtíðinni.

Allir vita að ástæða þessa áróðurs er löngunin til þess að koma ríkisstjórninni frá völdum.

Hversu dýru verði á þjóðin að kaupa það?