Ekki spurning

 Það er snilld hvað þeim Geir H. Haarde og Ingibjörgu Sólrúnu tókst að koma á góðum  málefnasamningi á stuttum tíma. Báðir þurfa að ,, éta eitthvað ofaní sig" eins og einhver sagði.  Því er ekki að leyna að undir niðri leynist nú dálítill kvíði hjá undirritaðri engu að síður. Enn hafa sjálfstæðismenn töglin og haldirnar í fjármálaráðuneytinu. Sjálfstæðismaður af ,,nýja skólanum" er með heilbrigðisráðuneytið og er það uggvænlegt.  En sem sagt ef einhver getur dregið úr hægri stefnu stjórnvalda undanfarinna ára þá er það Samfylkingin svo mikið er víst. 

Er ekki svolítið skondið að Siv Friðleifsdóttir og Guðni Ágústsson skuli nú í sífellu tala um að með nýju stjórninni fari frjálshyggjan á flug? Allir vita og viðurkenna að svo mikil hægri stefna hefur viðgengist undanfarin ár að stór hluti þjóðarinnar situr eftir efnahagslega séð og það með þeirra stuðningi enda misstu framsóknarmenn nær helming þingmanna sinna. Samfylkingin verður tregari í taumi hvað varðar harðar hægri áherslur. Gefum þeim tækifæri, trúum því þar til annað sannast.

„Vonast til að ný stjórn leiði erfið deilumál til lykta"